सूत्रधार ही नाट्यसंस्था १९७० पासून प्रायोगिक रंगभूमीवर कार्यरत आहे. सूत्रधारने काही अत्यंत वैविध्यपूर्ण आणि संस्मरणीय नाटकांची निर्मिती केली आहे. ‘प्रेमकहाणी’, 'चुटकीचे नाटक’, ‘आरण्यक’ , ‘लोककथा ७८’ , ‘गणेश गिरणीचा धैकाला’ ही त्यातली काही. 'लोककथा ७८' इतर भाषांमधेही अवतरलं आणि राष्ट्र सेवा दल, इप्टा, भारत भवन, रंगकर्मी या नामांकित संस्थांप्रमाणेच अनेक लहानमोठ्या संस्थांनीही त्याचे प्रयोग केले. ही सर्व नाटकं स्वतंत्र होती आणि प्रायोगिक रंगभूमीच्या वापरातून काही विचार मांडण्यासाठी त्यांची निर्मिती करण्यात आली. दिलीप प्रभावळकर, रवी पटवर्धन, डाॅ मीनल परांजपे, वसंत सोमण, अजय वढावकर, प्रदीप भिडे, सुप्रिया विनोद अशा अनेक नामवंत कलाकारांचा प्रवास बालनाट्य आणि सूत्रधार या संस्थांबरोबर झाला. चळवळ स्वरुपात अनेक वर्ष चाललेलं या संस्थेचं काम हे कोणत्याही अनुदानाशिवाय वा आर्थिक सहाय्याशिवाय केवळ रसिकांचं कौतुकमिश्रीत प्रेम आणि साधार अपेक्षा यांमधून बळ घेऊनच करण्यात आलं.